هو ليه دايما عندنا كرم في مشاعرنا؟ ليه لما نقابل شخص ونعجب بيه ونحبه نكون مستعدين ندي له عمرنا , حتي لو هو مش حاسس بينا ولا واخد باله مننا ولا فارقين معاه اصلا ؟! ومع ذلك بنفضل مستمرين في تضيع مشاعرنا , ومستمرين نوظف احساسنا في المكان الغلط. .ومع الشخص الغلط !ليه نفضل حاطين عنينا عليه طول اليوم مع انه ما اهتمش حتي يقول لنا صباح الخير؟!
ليه لما نشوفه جسمنا يتنفض ونسمع دقات قلبنا حققت رقم قياسي وهو واقف قدامنا وكأنه مش شايف حد ! ليه يشغل بالنا ليل نهار واحنا مش متأكدين حتي انه فاكر اسمنا !ليه نفضل سهرانين طول الليل في البلكونه مستنين منه طله او نشوفه داخل او خارج وهو كل مره بيخرج يقفل البلكونه بعد ما يقول لنا ( مساء الخير .... بعد اذنك ) ! ليه نفضل طول الوقت بنفكر ليه ازاي يطور شغله وازاي يبني مستقبله وهو عمره ما سالنا عن دراستنا ولا عاملين ايه في شغلنا
ليه دايما عندنا احساس ان عدم اتصاله بينا عشان رقمنا ضاع وهو هيموت ويلاقيه!ليه بنطير من الفرح اول ما نشوف اسمه ظهر عل الموبيل وهو عمره ما اتصل بينا غير عشان يسالنا عن حاجه !ليه بنعتبر نظرته لنا دي اكبر امنياتنا ويا سلام لو ضحك ! ليه عمره ما علق علي لبسنا او شكلنا ومع ذلك بنحضر لليوم اللي هيشوفنا فيه قبلها بيومين
ليه ديما نشكر ونمدح فيه وهو عمره ما قال لنا كلمه حلوه ! ليه دايما هو اول واحد نفكر نبعت له رساله في كل مناسبه وهو نادر ما بيرد عليها ! ليه كل ما بيغلط في حقنا بنخلق له الف غذر وسبب من غير ما هو حتي يتكلم وكاننا مش عايزين نتعبه بالاعتذار ؟
ليه دايما نكون اول حد يجيب له هديه في عيد ميلاده وهو عمره ما سالنا عن عيد ميلادنا ليه دايما بيتاخر عن مواعيده واحنا نكون جاين قبلها بساعه وبمجرد ما نشوفه بننسي الوقفه لساعات في الشمس ليه دايما بنكون مش عايزينه يغيب عن عنينا لحظه وهو ديما شغله والتزماته اهم !
ليه دايما بنكون حريصين نسمع صوته ونطمن عليه كل شويه ليه نفضل علي كده لحد ما يجي يوم يقابلنا في الشارع ويقول لنا (ان شاء الله هتبارك لي قريب ) فنرسم علي وشوشنا ابتسامه مفضوحه ونقول له ( بس ابقي اعزمنا )
هو احنا ليه بنعذب نفسنا ونحب من طرف واحد