شوية ورق

شوية ورق

شنطة قديمة
من زمان فوق الدولاب..
فيها صور وحاجات
وكام جواب..
ماعرفش ليه..
من وقت للتانى باحن
وافتح وافر ف الورق
وابص تانى ع السنين..
هنا كنت تلميذ ف ابتدائى
لكن هنا أصبحت مين..
دى صورة من جواز السفر
وهنا بابص ع القمر
وهنا ابتدى يبان الكبر
وابتدى كمان يبقالى كرش..
وده عقد الشقة القديمة
وأول وصل نور
والقيمة المطلوبة
تلاتة وتلاتين قرش..
يااااااه
ودى ورقة بعشرة جنيه
من ريحة السبعينات..
فى عز الحرب كانت
تقدر تعمل حاجات
وده صاحبى
وأنا بسأل عليه..
عرفت إنه مات..
ودى صورة أخويا
اللى راح وأنا صغير..
زى الأيام الجميلة
عمرها قصير..
وده يوم الفرح
اتجوزنا ف أغسطس
والحكاية بدأت ف مارس..
إحساس وراح لحاله
لما ابتدوا العيال
يشيلوا شنط تقيلة
وهم رايحين المدارس..
ودى ورقة مهمة خالص
كل مرة ألاقيها..
بتتوه منى تأنى
فى زحمة الورق..

صحيح كل واحد ديما بيحن لاوراقة القديمة
اللى بتفكره بالذكريات
شكرا على الموضوع ده

شكرا لاهتمامك بالموضوع