كرسي الاعتراف

مرسي على ردك على سؤالاتي

الرومنسيه كتب:

استنى بس استنى انا جيييييييييييييييت اسأل معلش اتاخرت بس عايزاك تجاوب عليا

اصلى كمان مينفعش الكل يسالك ما عدا اختك

اليك الاسئله يا محمد و انت عارف ان اسلئى خفيفه اوووووووووووووووى

1- اى من الجرحين اصعب جرح الصديق ام جرح الحبيب ؟ و لماذا ؟

2- اكتر مكان بتروحه و بتحس بالراحه ؟

3- انا شفت فى ردك ع سؤال محمود انك بتفكر كتير امتى فكرت و حسيت بالندم فى شئ ما ؟

4- لو جاتلك فرصه انك تغير حاجه فى حياتك هتغير ايه ؟

5- عايزه لقب يليق عليك غير الريس ؟

6- اى تختار عذاب الحب و لا خيانه من تحب ؟

معلش يا محمد طولت عليك بس يا رب تجاوب ع جميييييييع اسالتى

اختك مـــــــــــــــــــــــــى

مليكة الاحزان كتب:

اهلا بيك بروف على كرسى الاعتراف وسعيدة انى اول وحده هسئلك
1- ما هو حلم حياتك؟
2-ما لونك المفضل؟
3-ما هو الشئ الذى تحبه وايه الى تكره فى شخصيتك؟
4-ما هو اكتر شئ بتخاف عليه فى حياتك؟
5-ماذا يعنى لك الحب؟
6-ماهو اصعب موقف مريت بيه؟
7-لوحبيت وحده وعرفت ان اقرب صديق ليك بيحب نفس الوحده وقلك عليها رد فعلك هيكون ايه؟
8-اكتر حاجة زعلتك فى حياتك؟
9-لو خيروك بين صديقك وبين حبيبتك تعمل ايه؟



بالهنا وشفية فى الاسئلة
هههههههههههههه



حياه

اج1/ حلم حياتى معلش حياه هى مجموعه احلام (هو الستر فى الدنيا والاخره_ حلم حياتى هى انا التقى بنصفى الاخر البروفسيره علشان يسعد البروفسير ( وتكون كثيره الكلام زى)_ حلم حياتى هو ان يمد ربى فى عمرى وان يكتب لوالدتى حجه على حسابى ان شاء الله

ج2/اللون المفضل الى هو اللون الارزق السماوى لون السماء والبحر واللون البنى بكل درجاته لون طينه الارض

ج3/ ما هو الشئ الذى تحبه وايه الى تكره فى شخصيتك؟
هو صعب ان يوصف الانسان نفسه... بس ممكن اقولكى ممكن احب فى نفسى الصراحه الزائده وهى عيب ومميزه فى نفس الوقت... واللى اكره فى شخصيتى كثره الكلام مع تحليل المواقف بياخد وقت كتير اقوووى منى لانى اهتم بادق التفاصيل وبرده ساعات تكون ميزه وساعات كتير عيب


ج4 / اكتر شئ اخاف منه بعد ربنا طبعا هو الفقر فى كل حاجه ( المال _ الصحه _ فى الحب ... )علاوه على الخيانه والغدر

ج5/الحب أنا اريد مقالات علشان اقولكى ماذا يعنى الحب فى نظرى على الرغم بانها كلمه بسيطه متكونه من حرفين لكن ليها معانى كثيره فحرف(ح ) يعنى حياه زى اسمك والحرف ( ب) يعنى بقاء....

الحب فى نظرى حياه:هو الذي ينقل الإنسان إلى تلك الواحات الضائعة ،، واحات الطهارة والنظارة والشعر والموسيقى
لكي يستمتع بعذوبة تلك الذكريات الجميلة التائهة في بيداء الروتين اليومي الفضيع وكأنما هي جنات من الجمال والبراءة والصفاء في وسط صحراء الكذب والتصنع والكبرياء

الحب فى نظرى: تجربة إنسانية معقدة ،،، وهو أخطر وأهم حدث يمر في حياة الإنسان لأنه يمس صميم شخصيته وجوهره ووجوده ،،، فيجعله يشعر وكأنه وُلد من جديد

بس للاسف حياه

الحب الحقيقي نادر الوجود وذلك لصعوبة حقائقه ولصعوبة فهم معانيه ..

اما حب هذا الزمان فدعونا نطلق عليه .. (فراغ عاطفي يحتاج للإشباع)

فمتى تشبع هذا الفراغ بعاطفة الحب , انتهى الحب المؤقت ..


ج6/اصعب موقف مر بى فى حياتى هى مواقف كثيره لكن اصعبها يوم ان سمعت بان والدى توفى
يوم ماسمعت الخبر حياه
كل مابالكون نبض
إكتسى كله سواد
كله الم واوجاع ودموع وهم
يوم ما قالوا انه توفى...
الله يرحمك ابى واغفر له ربى خطاياه ونور للعبد فى اللحد واغفر لجميع اموات المسلمين أمين يارب العالمين

ج7 /لوحبيت وحده وعرفت ان اقرب صديق ليك بيحب نفس الوحده وقلك عليها رد فعلك هيكون ايه؟
هى يكون رد فعلى مختلف فى حالتين الحاله الاولى اذا عارف قبل ان يصرح بحبه لها لى انى احبها من قبله وهى ايضا تحبنى فى هذه الحاله ... لا اعتبره صديق لان الصديق من مميزاته المأثره على النفس انما هذا الصديق فى هذا الموقف فهو انانى الااذا اقول عنه خائن
الحاله الثانيه اذا لم يكن يعلم بحبى لها قبل ان يصرح بيه لى... فهذه الحاله لااعتبره صديق ايضا ولكن اعتبره فى مرتبه اقل من الصديق هنقول زمايل معرفه وليس صديق.. لان صديقى يعلم كل شئ عنى وانا بالمثل اعلم كل شئ عنه
وفى هذه الحاله سوف احتفظ بحبى.....

ج8/اكثر حاجه زعلتنى فى حياتى..... انى أتفهم غلط سواء من صديق او حبييب .. لو تريدى موقف بعينه مش متذكر حاليا

ج9/ اذا خيرونى بين صديقى وبين حبييتى ماذا افعل...؟؟
علشان ماكنش متناقض فى كلامى اذا لم يفعل صديقى هذا مايسئ لى من قريب او بعيد اذا كان صديق بمعنى الكلمه
سوف اختاره بدون تردد.... فالصداقه هى الوجه الاخر للحب .. ولكنه الوجه البراق الذى لايصدأ..



شكرا حياه على اسئلتك الجميله .. وياستى اكلتها بالهناء والشفاء وكانت جميله فعلا تسلم ايديكى
مع تحياتى وتقديرى الشديد ليكى
البروفسير الاخ والصديق

يلا منتظر اسئلتكم....لباق الاعضاء


[right]

اوك محمد عملتها فى .... بس عموما ياصديقى متشكر على اختيارى وطبعا انا لماجيت على الكرسى لقيته منور قبل ماقعد عليه عشان انتا كنت منوره قبلى....


يلا نجاوب على اسئلتك


ما هو الشئ الذى ندمت على عمـلــــه؟!؟

الشئ اللى ندمت عليه محمد انه كنت هخطب بدون حب... والحمد الله محصلش

كلمــة تمنيت ان تستطيع سحـبهــــا؟!؟

كلمه انا اسف لشخص لا يستحقها

آخـــر شخـــص تتـــذكــــره قبـــل أن تنـــــام؟!؟

امممممممممم اكثر من شخص محمد اولهم ابى رحمه الله عليه _ واللى بالى بالك ...

جــريمــة تتمنـــي لـــو تستطيـــع ارتكابهــــا؟!؟

اغتيال رئيس وزراء اسرائيل ... وهيكون لى الشرف بالاعتراف بيها كمان

على من تدمع عينك على فراق الحب ام فراق الصديق ؟؟

الاتيين محمد بجد وبكل صراحه ... وحصل معى الموقفين وفعلا دمعه عينى.. على الرغم بانى دمعى عزيز على

مـوقـــف صــدمــك ولــن تنســــاه؟!؟

موقف من صديق ماكنتش متوقع منه اللى عمله .. ومعلش بدون تفاصيل

شخص تتمنى الانتقام منه وايه سبب الانتقام ؟؟

لايوجد هذا الشخص .. لانى من النوع المسالم... وزى مابيقول المثل اللى باعك بيعه ولو بالرخيص..وايضا ماعنديش رغبه الانتقام انا بحتسب عند ربنا وخلاص

شــئ او عمــل لا تستطيــع مســامحته نفسك عليه؟!؟

اذا نسيت او تناسيبت فرض من فروض الصلاه .. حاجه مقدرش أسامح فيها نفسى..

شــئ او شخــص غيــّر مجــري حياتـــك؟!؟

فعلا يوجد هذا الشخص ... وفعلا غير مجرى حياتى... وكان ده فى مجال شغلى واصبحت من شخص بيشتغل فى مكتب الى شخص صاحب مكتب وله عملاء كثيره وله الفضل هذا الصديق بعد ربنا طبعا فى اول الامر

كلمة تود سماعها كل يوم؟!؟

ههههههههههه كلمه انا بحبك عمرى ما هميل منها وأود اسمعها كل لحظه مش كل يوم بس


لاء ابدا مطولتش محمد وشكرا على اسئلتك الجميله
لانك فى الحقيقه شخص جميل ومحترم واشرف بصداقتك فى المنتدى وخارج المنتدى

مع تحياتى واحترامى
الاخ والصديق محمود ( البروفسير )

ازيك انتى حنان اخبارك ايه .. انتى اللى منورنا والله ... واهلا بيكى معانا عضوه جديده فى المنتدى تستفيدى ونستفاد منكى طبعا......

ويشرفنى اجاوب على اسئلتك ..... يلا بينا


ايه اصعب المواقف اللي مريت بها ؟

السؤال ده حنان جاوبت عليه لما حياه ( مليكه الاحزان ) سألته ليه جاوبت قولتلها يوم ماسمعت خبر وفاه والدى رحمه الله

ما موقفك من الحب ؟؟ وهل جربته ؟؟ هل تأمن بوجوده ؟؟
-فأي قرار تتخذه هل ..... تحكم عقلك أم قلبك فيه ... ؟؟ ومن الأسبق
فالتحكيم
قلبك أم عقلك ؟؟؟؟؟؟؟؟

سؤالك مكون من عده اسئله ...
- موقفى من الحب :الحب عندى حنان تجربة وجودية عميقة تنتزع الإنسان من وحدته القاسية الباردة لكي تقدم له حرارة الحياة المشتركة الدافئة....
(الحب ) حرفان . حرفا يشعل القلب .. وحرفا يشغل البال

( الحب ) سؤال اجابة سؤال .. بحرا شاطئه بحر

( الحب ) مكانه القلب .. واحيانا القلب والعقل معا

ولكن بين القلب والعقل مسافة تحجب الوصول

( الحب ) حديثا لاينقطع .. وبحرا لا يجف .. حتى وانا جفت الكلمات

- تجربتى فى الحب : انا الأن فى حاله حب ...

إيمانى فى الحب :اكيد انا مؤمن بالحب .. بس الحب الحقيقى اللى له معانى خاصه عندى
فأسمى وأنقى صور الحب صورها لنا رب العزة فى كتابه الكريم" ومن آياته أن خلق لكم من أنفسكم أزواجا لتسكنوا إليها وجعل بينكم مودة ورحمة" صدق الله العظيم
الحب بمفهومه السماوى هو العلاقة الشرعية بين الأزواج أو ذوى الأرحام والمحارم
وما عدا ذلك هو مزيج مخلوط برغبة وقد تتحول لآثمة
الحب = مودة +رحمة
فإذا حدث خلل بتلك المعادلة البسيطة وجب التفريق حتى لا تستفحل البغضاء والكراهية


إتخاذى لقراراتى : عند اتخاذى لاى قرار احكم عقلى قبل قلبى ... وده فى مجال شغلى .. وفى مواقف معينه احكم قلبى قبل عقلى.. وده فى مجال الاحاسيس وخلافه
هل ندمت فحياتك على شي معيّــن ؟؟؟

هذا السؤال جاوبت عليه محمد ( الريس ) قولت ان الشئ الوحيد الذى كنت هندم عليه إنى كنت هخطب انسانه بدون حب


مالفـرق بين الحب والصداقة ؟ وهل يمكن ان يسلكا طرق الغيرة ؟

الحب عندى :- يبدأ بالسماع والنظر فيـتــولــد عنــــه الاستحســـــان ثـم يقــــــــــوى فيصيــــر مــــــودة ثـم تقــــــــــوى المـــودة فتصيـر محبــة ثـم تقــــــــــوى المحبـــة فتـوجـب الهــــــوى فـإذا قـــــــــوي الهــــــــــــوى صــــــــار عشقــاً ثـم يـــــــــزداد العشـــــــــــق فيصيـــــر تتييـمـــــــاً ثـم يـزداد التتييم فيصير ولهاً،، وهو قمة ما يبلغه المحب
الصداقه عندى :- هى الوجه الاخر للحب ... لكنه الوجه البراق الذى لايصدأ
وفى حكمه انجليزيه بتقول عن الصداقهThe truth in friendship is to me every bit as sacred as eternal marriage.
بمعنى الحقيقة في الصداقة أن كل صغيره فيها مهمة ودائمة كدوام الزواج ..

- يمكن الاثيين الحب والصداقه يسلكا طريق الغيره لكن يكون فى الحب اقوووى


شكرا ليكى مره تانيه حنان على أسئلتك الجميله واهلا بيكى عضوه فاعله فى منتدانا الجميل هذا
مع تحياتى وتقبلى فائق احترامى
الاخ والصديق البروفسير حاليا الخبير سابقا

السلام عليكم ورحمة الله وبركاته

ازيك يا خبير

بجد الكرسى منور بيك يا استاذى

تسمحلى بقى بدون ازعاج اسالك شويه اسئلة

ونبدأ ونقول بسم الله الرحمن الرحيم


1- يوم ما تحس انك محبط ويائس من حياتك وتعبت من كل اللى حواليك وان محدش حاسس بيك ولا بالامك ولا بحزنك وتعيك
تعمل ايه ؟؟؟؟؟؟


2- شابف محمود الاب هيكون شكله ايه مستقبلا ؟؟؟


3- كلمة نفسك تقولها ليك بس خايف من صدى صوتها جواك ؟؟؟؟


4- مكان نفسك تزوره وتعيش فيه طول عمرك ؟؟؟


5- اهداء منك ليا فى اربع كلمات ؟؟؟


6- وردة حمراء لمن تهديها ؟؟؟


7- ايه هو الانطباع اللى بياخدوه الناس عنك من اول معاملة بينكم ؟؟؟


8- حاجة راحت منك وحاسس ان عمرها ما هترجع ؟؟؟


9- موقف فى حياتك حسيت فيه بالخيانه ؟؟؟


10- اخيرا
دعوة تتمناها لنفسك ودعوة تتمناها لحد قريب منك ؟؟؟


انا كده انتهت اسالتى
ارجو انى ما اكونش ازعجتك
واتمنى ليك وقت سعيد ع الكرسى

بالتوفيق

مع تحياتى

ازيك سمسه انتى اللى منورنا والله .... طبعا من غير ازعاج اتشرف باسئلتك لى
يلا بينا نتمشى شويه وندرش وبالمره اجاوب على اسئلتك

1- يوم ما تحس انك محبط ويائس من حياتك وتعبت من كل اللى حواليك وان محدش حاسس بيك ولا بالامك ولا بحزنك وتعيك
تعمل ايه ؟؟؟؟؟؟
بيحصلى كتير كده سمسمه بس انا لقيت الحل .. على طول اروح اصلى وأنام .. اه انام وسبحان الله لما اصحى اكون انسان تانى خالص .. ويمكن لقيت حل مشكلتى كمان... انا من طبعى خيالى شويه ممكن اعيش فى عالم تانى صنعته فى عقلى والنوم بيساعدنى انى اوصل لهذا العالم بسرعه...


2- شابف محمود الاب هيكون شكله ايه مستقبلا ؟؟؟
امممممم ... الاب هو الاب سمسمه فى الماضى والحاضر والمستقبل هو السند ..هو عمود البيت ... هو الامان.. هو الحنان.. هو المأثره عن النفس ... وان اختلف الازمنه والاماكن.... نعم للاب دور مهم جدا في تربية الاولاد وتاثير عميق في حياتهم ....
دور الاب في التربية فى المستقبل..
باختصار على الاب ان يكون الرفيق.. المعلم.. المرشد الاخلاقي.. المحامي.. اضافة الى كونه مؤمن الرزق للبيت..
مع ترك مساحه من الحريه للابن او الابنه للاستكشاق العالم بنفسه ويكون فى هذه الحاله يقوم بدور الاستشارى وليس الرقيب...

3- كلمة نفسك تقولها ليك بس خايف من صدى صوتها جواك ؟؟؟؟
الكلمه هى ( حاسب نفسك ) على كل شئ وعلى كل حاجه فى حياتك لانى لو قعت وحاسبت نفسى هطلع مديون كتير لها .. وعلشان كده خايف اقعد احاسبها

4- مكان نفسك تزوره وتعيش فيه طول عمرك ؟؟؟
فى الدنيا أى مكان بيه حب وسعاده ومافيش فيه نقاق وكذب وخيانه لو فى مكان بالشكل ده نفسى ازوه واعيش فى طول عمرى...
فى الاخره ... طبعا نفس اعيش فى جنه الخلد ادخلها لا اطلع منها ابدا.. انا وجميع المسلمين والمؤمنين امين يارب العالمين

5- اهداء منك ليا فى اربع كلمات ؟
انا اقولك احسن من الاهداء سمسمه ... اهداء اهداها لينا رسول الله صلى وعليه وسلم من اكثر من 15 قرن وبرده من اربع كلمات بس....
عن جويرية أم المؤمنين ( رضي الله عنها ) : أن النبي صلى الله عليه وسلم..خرج من عندها بكرة حين صلى الصبح .. وهي في مسـجدها...ثم رجع بعد أن أضحى وهي جالسة...
فقال : مازلتِ على الحال التي فارقتك عليها...؟!
قالت : نعم...
قال النبي صلى الله عليه وسلم :
لقد قلت بعدك أربع كلمات ( ثلاث مرات ) لو وُزنت بما قلتِ منذاليوم لوزنتهنّ...!!

سبحان الله وبحمده ، عدد خلقه ، ورضى نفسه ، وزنة عرشه ، ومداد كلماته

والان بعد قرائتك لحديث الرسول صلى الله عليه وسلم...
دعينى أهمس لكى فى اذنكى.....
كنى مثاليه فى استغلال وقتك .....
بضع كلمات .. لا تأخذ منك ثواني تساوي أضعاف مضاعفه من أجور التسبيح...
فهل ستجعلى يوما يمر عليكى دون ذكرها .....
وغيركى قد تسابق على ذكرها...
إنها فرصه لاتعوض...!!


6- وردة حمراء لمن تهديها ؟؟؟
اولا اهديها ليكى ... ثانيا لجميع اعضاء المنتدى المحترمين من شباب وبنات ... ثالثا وبالأخص لكل من قال كلمه طيبه لانسان محتاجها.. وساعدته على الخروج من أزمته


7- ايه هو الانطباع اللى بياخدوه الناس عنك من اول معاملة بينكم ؟؟؟

الانطباع اللى بياخذه الناس عنى فى اول معامله بانى جاد جدا وده فى الحقيقيه.. وده طبعا عكس الانطباع اللى بيتاخد عنى هنا فى المنتدى نهائيا فى اول معامله بانى مرح بحب الضحك.... هههه

8- حاجة راحت منك وحاسس ان عمرها ما هترجع ؟؟؟

احساسى بعدم بالأمان ... ومن اهم اسباب هذا الاحساس وفاه والدى رحمه الله عليه .. ويوجد اسباب اخرى...كثيره ومتعدده.. واللى بشوفه فى الدنيا حاليا..

9- موقف فى حياتك حسيت فيه بالخيانه ؟؟؟
امممممم... ما اظنش فى مواقف حتى لو فى مواقف مابقفش عندها .... لو انه لو حدث ذلك لايستاهل الشخص الخانن لحظه تفكير منى .. على طوال اميحه من ذاكرتى ومن حياتى نهائيا ...

10- اخيرا
دعوة تتمناها لنفسك ودعوة تتمناها لحد قريب منك ؟؟؟

الدعوه اللى اتمناها لنفسى ولجميع اصحابى ولجميع البشر
هى دعوة سيد المرسلين ...
" اللهم اكفنى بحلالك عن حرامك وأغنى بفضلك عمن سواك " ( صدق رسول الله )

شكرا ليكى سمسمه على أسئلتك الجميله والمتميزه
وطبعا أنا استمعت وأنا بجاوب عليها... وفعلا أنا سعيد بوجودى معاكم

تقبلى شكرى وامتنانى
الاخ والصديق البروفسير

[ce
1- مــــن انـــــــت ...؟؟

2-باقة ورد لمن تهديها ...؟؟

3- باقة شوك لمن تهديها ...؟؟

4- اسوأ خبر سمعته...؟؟

5- شخص لاترفض له طلبا ..؟؟ مهما كان...

6- مـــــن يطـــــربك ...؟؟

7- ماهي التجربه التي تتمنى تكرارها ...؟؟

8- من هو توأم روحك ...؟؟

9- ماهو اكثر شئ تخشاه...؟؟

10- مالذي يشعرك بأكثر قدر من الحرج...؟؟

11- نزار قباني شاعر المرأه.... وانت شاعر من ...؟؟ ولمن تقولها..

12حمامة زاجل استقرت على نافذتك تحمل رسالة من مجهول فممن تتمنى ان تكون...؟؟..

13- شئ تريد فعله الان...؟؟

14- قطعة فحم صغيرة وجدار نظيف ماذا سترسم عليه ,,وماذا ستكتب تحت الصورة...؟؟

15- كلمه اخيره .. بعد ان اصابك الملل..؟؟....

nter][/center]

مستنيا منك اتجاوبني اوكي دودي

وعليكم السلاااااااااااام جانا هانم .....أولا أنا سعيد بانكى شرفتينى وأنا على الكرسى والله اسعدتينى كثيرا

ومنورنى فعلا...
ثانيا : باذن الله تعالى كل اجابتى على اسئلتك هتكون بمنتهى الصراحه والصدق وربنا شاهد على كلام وايضا اسئلتى على باقى الاعضاء

يلابينا نجاوب على أسئلتك وأكيد هتكون جميله زيك وشقيه .... ههههه

1-انت ليه متجوزتش لحد دلوقتى
القسمه والنصيب جانا بجد وبكل صراحه... انا كنت هخطب انسانه بس القسمه والنصيب ماتمتش الخطوبه... ويارب يامسهل يكرمنى بانسانه تكون على خلق وذات دين....

2-بما انك بتحب الطبخ وكدا يعنى لو جبولك بنتين واحده طباخه بريمو والتانيه انت بتحبها جدا هتختار مين ؟

طبعا بدون لف ودوران اللى بحبها حتى لو ماتعرفش تطبخ نساعد بعض لحد مانعدى المرحله ديت.. انا عارف انكى مستغربه اجابتى دلوقتى فعلا ديت الحقيقه.... انا عندى الحب والزاوج هو نوع من المشاركه

ربنا عز وجل قال فى كتابه العزيز قال تعالى : ( وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ) الروم /21 .
والموده والرحمه فى الايه الكريمه ديت جانا المقصود بيها المودة هي : المحبة ، والرحمة هي : الرأفة ، فإن الرجل يتمسك بالمرأة إما لمحبته لها ، أو لرحمة بها بأن يكون لها منه أولاد " .
طيب مادام انتى فى كليه تجاره وفى اخر سنه .. انا هشبه الزواج والحب بشكل تجارى .. الزواج عندى زى شركه تضامن مش شركه توصيه وطبعا عارفه الفرق بينهم شركه تضامن اى كل طرف منهم متضامنيين فى القرار وفى النتيجه كمان سواء مكسب او خساره .. بمعنى لو اى طرف من اطراف الشركه اخذ قرار منفرد سوف يضر بمصالح الشركه اجمعهاسواء بالسلب او بالايجاب ونتيجه هذا القرار لايتأثر بيها الطرف صاحب القرار المنفرد ولكن يتأثر بيها الطرف الاخر.. لانهما شريكان متضامينان..والافضل للشركه بانهما قبل اى قرار بان يجتمع الطرفان لأخذ القرار مجتمعين مع بعض .. حتى يتحملا نتيجه القرار سويا.... بس انا عندى راى فى توزيع الأدوار فى هذه الشركه بأن يكون الراجل فى منصب رئيس مجلس الاداره دوره فنى استشارى .. والست فى دور المدير التنفيذى لهذه الشركه.. ومش معنى كلامى ان يكون فى فضل على الراجل عن الست فىذلك.. بالعكس المدير التفيذى يمكن دوره اهم واشمل من دور مجلس الاداره وبيكون له صلاحيات كثيره .. لكن بيعملها بعد المشواره مع رئيس مجلس الاداره... يارب يكون وجهه نظرى وصلتلك.. وهى فرصه خليتك تراجعى معى دروسك...ههههه

3-انت اتمنيت فى يوم انك تكون بنت ؟ ولماذا؟ هههههههههه انا عارفه ردك هيبقا ايه بس بردو عايزه اعرف منك؟

طبعا لاء لا اتمنى اكون بنت ... وده مش تقليل من البنت لا سمح الله.. انا لا اتمنى ذلك وخصوصا فى مجتمعنا الشرقى ده.... بصراحه وبوضوح احنا عايشين فى مجتمع ذكورىبحتمحمور هذا المجتمع بيدور حول الرجل فقط... والست هنا فى مجتمعتا الشرقيه هى مكمله للرجل.. ويمكن فى ناس تزعل من كلامى ده بس ديت هى الحقيقه .. وعلشان كده جانا انا لا اتمنى ان اكون بنت لانى لا احب اى حد يسيطر على .. علاوه على ان المرأه معروف عنها ضعفها وسكينتها وده مش عيب .. بس انا لا اريد ان اتصف بتلك الصفات.... ايه جانا هى ديت الاجابه المتوقعه منى ولاه ليكى راى اخر


4-ايه الامنيه اللى انت اتمنتها ومتحققتش لحد دلوقتى؟
هما كام امنيه جانا
اولاها : انى والتى تزور البيت الحرام وتحج وان شاء المولى على حسابى الخاص ديت حاجه
ثانيا : ليه اخت اصغر منى لسه متجوزيش اتمنى ان ربنا يرزقها بن الحلال اللى يقدرها ويصونها لانها تستاهل كل خير ..
ثالثا : بالنسبه لى انا ان ربنا يكتبلى زوجه صالحه محبه لى وانا محب ليها ويرزقنى منها الذريه الصالحه

5- ايه اكتر حاجه بتحبها واكتر حاجه بتكرها ....
انتى محدتيش فى اى مجال الحب والكره دولت .. عموما
مثلا فى المرأه .. أحب المرأه الذكيه وأكره المرأه الغبيه
الراجل احب الرجل المثقف المرح .. وماحبش الراجل الجاهل اللى بيعتمد على جسمه اكتر من عقله
بالنسبه للأكل بحب المحشى ورق عنب والمكرونات بكل انواعها.. واكره اى طبيخ أخضر زى ( الفاصوليا الخضره .. الكوسه .. الباميه ).. ههههههه

6-لو عندك معاد لرحله للقمر ..ومينفعش يروح معاك غير شخص واحد مين هو ؟
اخدتك معى جانا واسيبك هناك علشان ارتاح منكى وترتاح البشريه جميعا منك.. ههههههه بس مش هينفع تصدقى يعنى قمر هيروح للقمر لاء ماينفعش...
طيب مشكله تاخد مين يابروف .. اممممم اه هأخد اللى هيدق ليها قلبى طبعاو نقضى شهر عسل هناك

7-تفضل الجواز التقليدى ولا عن حب يا كازنوفااااا هههههههههههههه؟

مادام انا كازنوفااا زى مابتقولى يبقا اكيد عن حب ياعدوه الراجل .. بس صدقى كازنوفا ده اسم جميل هههههههه .. هو فى اعضاء اطلقوا على اسامى كتيره ويمكن انتى تعريفيها منها الدكتور والكابتن والاسطى والبرنس والخبره وغفير المنتدى على راى منجه وابا العمده... بس جديده كازنوفا ومااظنش انى فيا مواصفات منه .... ماعلينا
افضل واتمنى من الله ان يكون زواجى عن حب .....علشان تكون هى مقتنعه بى وانا كمان متنقع بيها

8-ممكن تتنازل عن مبدئك عشان خاطر امراه ؟

احتمال يعنى مش كبير بس على حسب الموقف والحاله.. وهى أذا كانت على حق فى كده أتنازل على طوال.. لانى من النوع اللى بيسمع ومتكبرش على الغلط...

9-صحابك اغلى عندك من نفسك ؟
لاء طبعا واللى يقول كده يكون كداب ومنافق كمان ومستعد اناقشه للصبح .. بس هنا مش وقته

10-بتخاف من الكلاااااب هههههههههههههه
هههههههههههه بموت منهم بخاف فعلا منهم

11- انت انانى ؟
هو الواحد صعب يتكلم عن نفسه .. والسؤال ده المفروض يتسأل اللى يعرفونى مش أنا
بس هجاوبك ... على ما أظن لاتوجد فى الصفه ديت.. بس ممكن اكون أنا نى فى حبى ..

12-الكليمات دى تعنى ايه بالنسبالك
الحب : انا جاوبت عن معنى الحب كتير فى اسئله الاعضاء اللى قبلك جانا بس ممكن اقولك الحب هو فرصة ليصبح الإنسان أفضل وأجمـل وأرقـى .... وأيضا الحب هو عطاء وتضحيه

الصداقه : هو الوجه الاخر للحب ... ولكنه الوجه البراق الذى لايصدأ .... فالصداقه كالمظله..تظلك اذا ساء الجو..

الخيانه : هى صدمه كبيرة يواجهها الإنسان من إنسان لم يتوقع منه ذلك الفعل المشين و الخيانة وجدت على الأرض لنعرف معنى الأمانة والصدق

العمر : هو الشئ الذىإذا نسيناه او عمالنه نفسنا نسينوه.. دايما بيفتكرنا ولكن الشئ الوحيد الذى نكره سؤاله عنا

البحر: البحر عندى يشبه الحب بتقلباته الكثيره من هدوء تام وصفاء وساعات عواصف ونوات .. البحر هو الحب بداخليه الخير وساعات بداخله الشر أيضا وألا لم يكن الموت


شكرا ليكى جانا على أسئلتك الجميله والشقيه فى نفس الوقت .. ويارب اكون عند حسن ظنك واكون جاوبت بصراحه ونورتنى مره اخرى


مع تحياتى وتقديرى الشديد ليكى
البروفسير الاخ والصديق

منور الكرسى والله يابروف
انا بقى اسالتى هتكون سهلة وبسيطه وعسوله زيك ياقمر


انت شخصية مغرور؟؟

معجب بشخصية مين فى المنتدى؟؟؟

لو حد كنت بتثق فيه اوى وخانك هيكون رد فعلك ايه؟؟؟

لو بتحب واحده وهى متعرفش انك بتحبها هاتقولها ولا؟؟

بتحب تلعب كورة ههههههه؟؟


بس شوف اسالتى صغيرين ازاى يلا اى خدمة

نايم محمود ولا ايه فين الرد على اسءلتي الله

بذمتك ضحى مش قمر بجد ولاه أمر بالستر بقا...... هههههه واذا ابتليتم فاستروا ..... بس تعالى قولى ماقولتليش ليه أزيك ياكابتن زى ما دايما بتقوليها.... ما علينا انتى والله اللى منورنا ياصمت وهمس الليل الصعيد الطويل ....

يلابينا نجاوب على اسئلتك ولاه وركى حاجه مش فاضيه... يلا بينا


1)موصفات فتات احلامك؟

مواصفات عاديه ديدى أن تكون ذات دين وخلق ... من بيت طيب .... مثقفه ... ذكيه.. تحبنى وتحس بيا ...
مصعبتش المواصفات اهودت ... ومن تلقى فى نفسها تلك المواصفات أن تتصل بديدى وهى تقوم بلازم ..ههههه


2).من يسكن قلبك؟
كثيرون ضحى... ومن كترهم قلبى بدأ يوجعنى بجد.... أسرتى تسكن قلبى ...أصدقائى يسكنون قلبى .. اللى بالى بالك واخده غرفتيين وصاله على الشارع فى قلبى ... جميع الناس اللى بيحبهم ساكنين جوه قلبى مش عاوزين ينزاوا منه حتى لو جبتلهم أمر إزاله من الحى....

3).((مستحيل انساك)) لمن تقولها ؟
واحد فى دار الحق ( الأخره )... هو أبى رحمه الله عليه
واحدفى دار الباطل ( الدنيا ) ... حبيتى الى هيدق ليها قلبي البروفسير


4).هل تعترف بشيء اسمه الصداقه بين الرجل والمرأة ؟

بصراحه الأول كنت لااعترف بالصداقه بين الرجل والمرأه وده ليس من بعيد .. بس الأن أعترف بأنه ممكن أن تقام صداقه بين الراجل والمرأه وليس لغرض إلا الصداقه....


5).هل انت مدمن تفكير؟
بصراحه ايون أنا مدمن تفكير فى كل شئ وفى كل تفصيله حتى لو كانت صغيره

6).من هو اكثر شخص تفكر فيه؟
أفكر فى حالى أنا اولا ... وأحاول بين حين وحين أنى اقومها .. وبعدين أفكر فى حال أسرتى

7).هل تكره شخص بشده في حياتك ؟

لايوجد هذا الشخص لأنى لاأعرف كلمه كره ديت ...لإنى لغيتها من قاموسى.....


.ماالذي يلفت انتباهك بسرعه في الشخص لكي تعجب به؟
أسلوبه فى الكلام ..... ماهو لازما يتكلم عشان أعرفه وأعجب بيه


9)هل ملابس الشخص امامك تؤثر فيك لتأخذ عنه انطباع ؟؟
أحيانا وليس غالبا.... يعنى بتدينى إنطباع أولى بس لايدم هذا الانطباع عن هذا الشخص حتى يتكلم وأعرفه كويس

10).عاده تفعلها دائما تتمنى ان تتركها ؟

كثره الكلام .. وتحليل المواقف


11).هل انت من لديهم رغبة حب التملك واذا تملك الشيء اصابه الملل منه ؟
فى بعض الأشياء فقط .. كالحب مثلا .. اه عندى رغبه فى التملك فى الحب مش عاوز حبيتى تكون غير ليه أنا وبس...بس أذا ملكت الشئ اللى برغب فيه لا أمله ابدا .....


12)هل قلبك دق لاحد ؟ وامتا دق؟ وممكن ديق كام مرة؟

ايون تتخيلى ديدى دق قلبى ...ونبى دق .. أمتى وزاى وفين .. بدون تعليق13)


13اربعة بتعزهم فى المنتدة ؟
أنتى بخيله أقوووووى ديدى أربعه بس... أنتى عاوزه كتير من الأعضاء يزعلوا منى ... بجد فى كتير فى المنتدى ده بعزهم.... زيكى انتى ديدى- واول اتيين كلمتهم فى المنتدى ده منجه ( جانا ) وبنوت كيوت (نيره ) - ومى الرومانسيه - وارق بنوته وطبعا جانا - ودينا علام - وطبعا كوثره وصابرين - وفله - لانا- والاعضاء اللى لسه متعرف بيهم جداد عائله الاحزان ( سما وسلمى ونهى ) - ومنساش الحب الخالد ( كرمله ) وناريمان- وانسان ( دعاء)_ وقطه شاميه ( مايا)
دول تقريبا من البنات والستات

بالنسبه للراجله الريس - الخطير - القيصر - الزعيم - عرابى - والواد كانووو الى معدتش باين ليه - وابو ادم - وذكى

كتير اقوووى ضحى يعتبر كل الأعضاء أنا خايف اكون ناسى حد.........كلهم بجد بعزهم


14) هل تؤمن بحب النت ؟

الاول ما كنتش مقتنع به... وبعدين قولت ليه لاء النت زى اى وسيله للتعارف .. بس لازما فى خطوات تتعمل عشات يتقوى الحب ده


15)كلمة بحبك تقولها لمين وامتا تقولها ؟
الى حبيتى اللى هيختارها قلبى.. عندما احس بحبها ناحيتى أيضا

16)اكتر صفة تكرها فى حبيبتك؟
الشك فيا.. وليس الغيره هناك فرق بينهما


17)هل ممكن تخون حبيبتك ؟وهتقولها اية اسبب؟
اولا اذا الواحد خان يبقا مش بيحب... واذا كانت نزوه وهو فعلا بيحب حبيته وكانت الخيانه نزوه عابره .. طبعا مايقولش لهايعنى ربنا ستره هو بيخون يفضح نفسه هو.. بس يحاول يكفر عن خطائه ده بالتوبه وبأن لايعود تانى له ابدا


18)اوصفلنا حياتك فكلمات بسيطة؟
زى أى حياه فيها الحلو وفيها المر...فيها السعاده والحب وفيهاالحزن .. فيها النجاح وفيها الانكسار...وساعات مافيهاش حاجه خالص فراغ تااااام وحده موحشه...


19) اكتر صفة بتحبها فى شخصيتك ؟ واكتر صفة تكرهة
صعب السؤال ده اللى مفروض يجاوب عليه الناس اللى بيتعاملوا معى ...بس ممكن اقولك ضحى هى صفه بحبها واكرها فى نفس الوقت هى الطيبه الزائده عن الحد..... ممكن تستغربى ده بس ديت الحقيقه


20)(اقنعة الحب سبعة) جملة تصدقها ولا لا
طبعا جمله لا اصدقها لان الحب لازما لايكون له أقنعه .. فالحب يكشف كل هذه الأقنعه .. يكشف الكذب النفاق الغش
الحب الحقيقى هو مراه للمحبيين ينظرون اليها يروا الحقيقه وليس أقنعه...


21) اكتر لقب حبيتة فى الاسماء اللى طلعت عليك فى المنتدة اية

ههههههههه طيب نقول الالقاب الاول هى ايه ديدى
اللهم صلى على النبى ... اه البروفسير - الخبير - الكابتن - الدكتور - الاسطى - الخبره - البرنس- الاستاذ

اه نسيت على رأى جانا كازنوفاااااا ههههههه

أحب الاسماء اللى انا الكابتن وبعدها البروف



شكرا ديدى نورتنى بأسئلتك الجميله والمتميزه ولاء ابدا مطولتيش .. بس سهرتينى عشان أجاوب عليها بس ولايهمكى

مع تحياتى وامتنانى وتمنياتى الخاصه ليكى بالنجاح والتوفيق فى حياتك العلميه والعمليه

الاخ والصديق البروفسير الكابتن